UN BANCO DE TERRAS?

Hoxe hai moitas explotacións agrarias que teñen interese en aumentar a súa base territorial, incorporando terras de labranza ou prados para producir herba ou forraxe e ter menos dependencia de alimentos concentrados.

O aumento do tamaño das explotacións gandeiras, de horta e de viñedo, entre outras, pode permitir que estas sexan viables economicamente, sen que se vexan obrigadas a pechar.

As persoas que se dedican á actividade agraria teñen moita dificultade para conseguir novas fincas mediante compra, polo altos prezos das terras.

Tampouco hai un mercado fluído de fincas en aluguer: moitas persoas donas de fincas déixanas abandonadas antes que arrendalas, por temor a perder dereitos sobre as propiedades.

Cada vez vemos, con máis frecuencia, como ao lado dunha explotación activa que ten interese en ampliar as terras traballadas, hai outra en grave situación de abandono, que pode ocasionar danos por incendio, pragas ou enfermidades, ademais de non producir nada. En definitiva, unha finca agrícola que só ocasiona problemas para o conxunto da sociedade, podendo producir riqueza para o propietario e para o agricultor.