A ampliación da base territorial das explotacións permitirá
unha menor dependencia de pastos e forraxes externos, así como a
posible diversificación de cultivos, aumentando a capacidade produtiva
das explotacións e a posibilidade de apertura a novos mercados para
a comercialización dos produtos agrarios.
Obxectivos e finalidades que redundan nunha elevación do nivel de
vida dos agricultores, abrindo e facendo atractiva a actividade agraria
a novos sectores de poboación para o seu asentamento no rural, superando
así o envellecemento e o abandono do agro galego.
A posta en valor dos predios agrarios infrautilizados, semiabandonados ou
en grave situación de abandono son unha potencial fonte de riqueza
sobre as que o banco de terras debe incidir de xeito especial, poñéndoos
á disposición das explotacións para establecer, ampliar
ou dotarse dunha base territorial que mellore a súa competitividade
e viabilidade técnico-económica e social.
Para acadar este obxectivo, a Xunta de Galicia procederá á
declaración de zonas de especial interese agrario ata abranguer de
xeito progresivo a práctica totalidade da superficie agraria do territorio
galego.
Mediante o Decreto 206/2007, do 25 de outubro, a Xunta de Galicia iniciou
a declaración de zonas de especial interese agrario co obxectivo
de acadar de xeito progresivo a práctica totalidade da superficie
agraria do territorio galego.
Mediante o Decreto 263/2007, do 28 de decembro, a Xunta de Galicia continuou
coa delcaración de zonas de especial interese agrario.
Logo dunha primeira análise do territorio determináronse unhas
zonas caracterizadas pola súa alta produtividade agrícola
e gandeira posta de manifesto pola existencia de explotacións que
o avalan ou polas propias características e potencialidade dos terreos
ou zonas en que se localizan. Zonas que foran obxecto de concentración
parcelaria ou que poderán selo no futuro, nas cales, a actividade
agropecuaria, número de explotacións, plans de mellora, incorporación
de mozos e mozas á actividade agraria, son factores que se tiveron
en conta para a determinación de zonas de especial interese agrario
que realiza este decreto.
Por todo o exposto, de conformidade coa proposta do conselleiro do Medio
Rural e logo de deliberación do Consello da Xunta de Galicia na súa
reunión do día dezaoito de decembro de dous mil oito,
DISPOÑO:
Artigo 1º
Declárase de especial interese agrario o solo rústico de protección
agropecuaria situado dentro do ámbito territorial dos concellos seguintes:
-Na comarca de Bergantiños: A Laracha, Carballo, Coristanco, Malpica
de Bergantiños, Ponteceso, Cabana de Bergantiños e Laxe.
-Na comarca do Barbanza: Rianxo, Boiro, A Pobra do Caramiñal e Ribeira.
-Na comarca do Eume: As Pontes de García Rodríguez, Monfero,
A Capela, Cabanas e Pontedeume.
-Na comarca de Muros: Muros e Carnota.
-Na comarca de Noia: Outes, Noia, Lousame e Porto do Son.
-Na comarca de Santiago: Val do Dubra, Ames, Brión, Teo, Santiago
de Compostela, Boqueixón e Vedra.
-Na comarca do Sar: Rois, Padrón e Dodro.
-Na comarca dos Ancares: Navia de Suarna, Cervantes, Becerreá, Baralla,
As Nogais e Pedrafita do Cebreiro.
-Na comarca de Lugo: Friol, Outeiro de Rei, Rábade, Lugo, Guntín,
Portomarín, O Corgo e Castroverde.
-Na comarca de Sarria: Láncara, O Páramo, Paradela, Sarria,
O Incio, Samos e Triacastela.
-Na comarca da Ulloa: Palas de Rei, Monterroso e Antas de Ulla.
-Na comarca de Allariz-Maceda: Xunqueira de Espadanedo, Maceda, Paderne
de Allariz, Baños de Molgas, Xunqueira de Ambía e Allariz.
-Na comarca da Baixa Limia: Bande, Lobeira, Entrimo, Lobios e Muíños.
-Na comarca de Terra de Trives: San Xoán de Río, A Pobra de
Trives, Manzaneda e Chandrexa de Queixa.
-Na comarca da Paradanta: O Covelo, A Cañiza, Crecente e Arbo.
-Na comarca de Pontevedra: Campo Lameiro, Cotobade, A Lama, Ponte Caldelas,
Barro, Pontevedra, Poio e Vilaboa.
-Na comarca de Caldas: Catoira.
Artigo 2º
A estas zonas seranlles de aplicación os preceptos da Lei 7/2007, do
20 de maio, de medidas administrativas e tributarias para a conservación
da superficie agraria útil e do Banco de Terras de Galicia..
Disposicións derradeiras
Primeira.-Autorízase a Consellería do Medio Rural para ditar
cantas disposicións sexan necesarias para o desenvolvemento e execución
deste decreto.
Segunda.-Este decreto entrará en vigor o día seguinte ao da
súa publicación no Diario Oficial de Galicia.
Santiago de Compostela, dezaoito de decembro de dous mil oito.
Emilio Pérez Touriño
Presidente
Alfredo Suárez Canal
Conselleiro do Medio Rural
